Brarginian Xan Brarginian Awa Bewafa Biratam

ہائے مہ نامیرو رویان اوا ݯھوتی اوا گوسو ن
 وطنہ جم روئے  نکی تمثیل کھیو دوم ژانو سوم

عاشقان بو لو دِکو اسپہ دی کم رو لو دوسیان
آسمانار دیاو زمینہ چھوٹیو سوم گوسون  بوسیان
ونگہ چھوٹیوموڑی لعل دُردانہ دی لیسیان

براگنیان ژان براگنیان اسپہ بے وفا براتم
مہ دوست وطنہ زندہ ڈق کیہ رے خفا براتم
پھوک ژان اللہو دیرومہ چوڑئینو کورا لینیان

برار گنیان ژان برارگنیان مہ ژانوتین زور بیتی شیر
تہ شون غنچہ ریحان بو چھوݰی ران وور بیتی شیر
رویان دلیلو سورا غیچ مہ سورا چھور بیتی شیر
شکایت پروشٹی اوشوئے نسین چرسو زور بیتی شیر

بوسون کیاوت بیرو مہ ݯھیک تان کوروو گیرو
دوستو ݰیلی پرچم پھور بیتی کوٹھوو و دیرو

اوا ہارین لوڑاوہ شیشا پوشیتام نخشہ
ہزار بارغلام ہوتام ای لاکھ ہوتام روموتین بادشاہ

گمبوریان ایتو دیتی ݰاشوترینین بند کورونیان
اوا عشقو دیوانہ روئے مساری شنگ کورونیان

زخمی دی ݰاؤ تازہ بوئے پولوئدو نشونو تان بوئے
مہ ژان بادشاہ کی بیسیر ہر چھوچیہ خاوسونو مہ بوئے

جوشان موژی حسابی موݰیچو فورا پالین بوئے
عاشقان سست لو مودیور ڈقیو راہ ا ن الین بوئے

وطنہ کھل روئے تھرار ای اوا گدیری اسوم
سلوکان ہوݰ نوکوئی اوچوتو رویان کیہ جݰوم

دوستو پوشین کی بیسیر سمندرہ سیر نیزیسام
دوستو کرینین کی بیسیر بوہتوسار دی تیل نیزیسام

مایونئے مو چوڑیکی مہ دینار اوراری اسور
تو تانتین اولوئے بیس دوستو ہردی مہ سار چھیور

مایونئے مو چوڑیکی مہ بلبلو زران موکورے
مہ ژان کی ایہ روپھیتائے تھے چوڑے شنگ موکورے

کافرو رحم نو بوئے مسلمانو ژان پولوئیر
تہ فقیر اوہ نو کوروم کی اریت زوم اولوئیر

اوا اوچے مہ دینار کھاڑ ای برابر کی بیسام
مہ ژان تان  ٹیکہ ہ دریسر کھارا گلسمبر کی بیسام

راک پ یرا ن تہ تھانوتین تکمہ ُدردانہ کی بیسیر
مہ دوست مسوم کی گیسیر گدائی تنہا نو بیسیر

جوست کھونگور ای ہانو نو بینی ُملکا اشکار کھل رائے خبار
مہ ژان صورتو لاڑیر ہردی ݯھومیکار کیہ خبار

پردومو فہلہ بیتی شیرو پھوستو سورا انجے
تونیشو ذہنہ بیتی انگریزانن قسمہ کوسے

ہائے مہ نامیرو رویان دو ستو کوٹو ژیری کی بوم
قورے یاو شیلوغ دیسام دوستو پوشی ژیری کی بوم

شورو کاغو پوݯہ چلاہو بوݰیک کی توریت
ڈقیو عمر عزیز فرشتو دستہ پوریت

تہ عشقو شونج مہ ہوستہ سوئیم اوچے شوتور کو رو م
ژان روئے وطنہ زندہ کو کیڑیمان شکر کو رو م

مہ دینار مسوم نو ہائے ماتین طعنہ ہوئے گدائی
مہ دوستو پونگو ځوخ مودیار مہ ژان خدائی

اسمانی تو مݰکاوا خوش گیتی زمینہ دیرو
مہ گلہ اللہوتے ُدردانو شومانتین دیرو